P6 Bilyones ray aprubahan sa gipangayong P10 Bilyones

CEBU, Philippines - Nahuman na g’yud ang gipahigayon nga Budget Hearing sa mga sakop sa konseho kabahin sa gisugyot ni Mayor Michael Rama nga P10.5 Bilyones nga Annual Budget sa dakbayan karong sunod tuig. Adunay konsehal nga alyado sa Bando Osmeña Pundok-Kauswagan (BOPK) nga mitug-an nga dili nila aprobahan ang kinatibuk-ang budget nga gisugyot sa mayor.

Atol sa sunod-sunod nga mga budget hearings, ang mga department heads maoy gipanguta kun unsa ang mga priority project sa tagsa-tagsa nila ka departamento aron paghatag og ideya sa mga konsehal. Kini tungod kay gibana-bana nga mga unom ka bilyon ka pesos lang ang aprobahan sa konseho. Wala dayon mohatag og pamahayag si Mayor Rama kun malipay ba siya kun kini ra maoy kantidad nga aprobahan.

Naglaom si Rama nga suportahan siya sa mga konsehal, apil na sa mga alyado sa BOPK, tungod kay daghan siya og mga proyekto nga buot ipatuman sa sunod tuig.

Apan si Konsehal Osmeña miingon nga bisan og aprobahan pa nila sa konseho ang kinatibuk-an nga kantidad nga gisugyot sa mayor dili gihapon matuman ang iyang gipangandoy nga proyekto kun dili makolekta ang kantidad sa budget.

Sa P10 bilyones nga Budget nga gisugyot ni Rama, ang unom ka bilyon niini adto kuhaon sa halin sa yuta nga giingong ibaligya sa mayor diha sa South Road Properties.

Matud ni Konsehal Osmeña nga wala pay siguro kun si Rama makabaligya g’yud og yuta mao nga dili nila aprobahan ang kinatibuk-ang kantidad nga gisugyot sa Annual Budget.

Dugang ni Osmeña nga kun makabaligya man si Rama og yuta nga moabot og unom ka bilyon, mahimo ra siya nga moduso og supplemental budget.  Karong buntag gipaabot nga hisgutan ang pagduso ni Osmeña og rekomendasyon kun pila gyud ang tanang budget nga aprobahan sa konseho. (BANAT NEWS)