VM Gica mipasaka na usab og kaso batok kang Mayor Garcia

CEBU, Philippines - Gidugangan ni Bise Mayor Efren Guntrano Gica ang iyang gipasaka nga reklamo batok ni Dumanjug Mayor Nelson Garcia sa Hunta Probinsiyal.

Niining bahina, giapil na ni Gica ang iyang kaubanan sa konseho nga sila si Konsehal Ricardo Boquecosa, Ricardo Condes, Ely Amadora, Miriam Llaño ug Antonio Garcia.

Si Gica nireklamo og pagpangabuso sa gahom batok ni Garcia ug kakunsabo ang nahisgutang mga konsehal nga kaalyado sa politika sa mayor.

Si Garcia nipatawag og special session sa konseho niadtong Oktubre 11, 2013 ug Nobiyembre 21, 2013 pinaagi sa sangguniang bayan secretary Emmylou Cabonilas.

Wala nahimuot si Gica sa gihimo ni Garcia sanglit pagpanapaw kini sa iyang gahum isip bise mayor nga maoy pangulo sa konseho.

Matud pa ni Gica nga malisyoso kaayo ang lakang ni Garcia ug nakaguba kini sa iyang integridad. Apan matud pa ni Garcia nga ang reklamo nagpakita lang sa kaignorante ni Gica.

Matud pa ni Garcia nga adunay gahom ang mayor nga mopatawag og special session sa konseho. Si Garcia nipasangil nga nagtinguha ang grupo ni Gica nga masuspenso siya sa katungdanan sama sa gihimo ngadto sa iyang igsoon nga si kanhi gobernador ug karon Kong. Gwendolyn Garcia.

Sumala pa ni Garcia nga nakadawat siya og taho nga buot sa kampo ni Gica nga masuspenso siya sa dili pa ang Pasko.

Si Kong. Garcia kahinumduman gipasuspenso og unom ka buwan sa Malakanyang sa niaging Disyembre, pipila ka adlaw sa wala pa ang Pasko.

Susamang kaso ang wala pa natuki sa hunta probinsiyal ang gipasaka na ni Gica batok ni Garcia. (BANAT NEWS)