Pito ka biktima sa MV Saint Thomas Aquianas nailhan

CEBU, Philippines - Nailhan na sa Philippine National Police Crime Laboratory-7 ang pito sa 50 ka mga patay nga lawas sa pagkalunod sa M/V St. Thomas Aquianas nga wala dayon mailhi ug gilubong lang una sa mass grave sa Carreta Cemetery sa Cebu City human sa cross matching sa ilang Deoxyribonucleic acid (DNA) samples.

Apan lima lang una ka mga pangalan ang gipahibalo sa crime lab tungod kay ila pang tinoon ang records sa nahabiling duha ka biktima.Ang mga naila naglakip sa usa ka Chinese national nga si Wu Cheixin, 2, Alma Pomoy, Jeruld Hotahot, Agatona Lafuente ug usa sa managsuong Pilar Jualo ug Delia Galandrina.Si Chief Insp. Benjamin Lara, medico-legal-officer, nagkanayon nga ang donor sa sample sa managsuong Delia ug Jualo mao ang ilang inahan nga si Rupina Galandrina nga mi-matched sa duha niini ka mga anak.Apan ang problema karon sa crime lab mao ang pag-ila kun kinsa gyud sa duha nila ni Delia ug Jualo. “It’s better kung dunay anak either usa nila aron gyud mahibaw-an nato sino sa kanila si Jualo and Delia,” sumala pa ni Lara. Gipaubsan sa crime lab ang ihap sa mga patay nga lawas gikan sa 53 ngadto sa 50 na lang ka mga patay nga lawas human nasuta nga ang tulo ka mga parte sa lawas iya lamang sa usa ka tawo. “The right arm, leg and right leg found used to have three different case numbers but during cross-matching it turned out that those were owned by one and same person who was Pomoy,” sumala pa ni Lara.Ang duha ka mga patay nga lawas bisan pa man duna nay resulta apan ang mga medico-legal officers sa crime lab kinahanglan pa nga ilang susihon ang case number ug sa record niini.

Giklaro ni Lara nga walay time frame ang cross-matching sa DNA samples tungod kay kinahanglan nga eksaminon gyud nila og maayo ang tanang mga samples sa mga biktima ug matud pa niini nga timing lang nga dali lang ang resulta sa maong eksaminasyon. “Tiempo lang na pag-match namin may results na kaagad,” matud pa ni Lara.Nanawagan ang mga opisyal sa crime lab sa mga pamilya sa biktima nga modiretso sa ilang buhatan sa  Camp Sotero Cabahug o sa Cosmopolitan Funeral Parlor aron mapahigayon ang pag-ugkat sa mga patay nga lawas sa biktima sa sam-ang sa Carreta kung buot nila kini madala pauli sa ilang mga lugar.

Ang patay’ng lawas ni Lafuente giugkat na kagahapon sa hapon ug gipa-cremate aron dad-on sa ilang probinsya sa Agusan del Sur.  (BANAT NEWS)