CEBU, Philippines - Kritikal ang kahimtang sa duha ka mga lalaki human kini pamusila sa managlahing lugar ug higayon sa lalawigan sa Sugbo sa miaging adlaw.
Sila mao si Herman Mahilum, minyo, stay-in worker sa usa ka suroyanan sa lungsod sa Balamban, ug Filmar Vilbar Pedrosa, 22, ulitawo, taga sitio Lawis, barangay Jugan sa Consolacion.
SI Mahilum gipusil ni Niel Manubag Torres , 19, ulitawo taga dakbayan sa Canlaon, Negros Oriental.
Basi sa imbistigasyon sa kapolisan nasuta nga ang biktima nagpasiga sa suga sa ilang trabahoan ug samtang didto siya sa switch board didto usab diay magtago sa bongbong ang supetsado.
Matud pa nga wala gyud makabantay ang biktima kay busy man kaayo kini sa pagpasiga sa mga suga dihang gipusil kini sa suspetsado sa nagkadaiyang parte sa iyang lawas.
Gihatud dayon kini sa iyang mga kaliwat ngadto sa Balamban District Hospital aron mapatambalan.
Samtang ang suspetsado didto na dakpi sa kapolisan sa balay sa iyang hinigugma apan wala na marekober sa kapolisan ang armas nga gigamit sa biktima. Samtang si Pedrosa naangol usab human pusila sa nailhan lang nga Juko didto sa sitio Lawis sa barangay Jugan sa lungsod sa Consolacion sa alas 4:20 sa kadlawon sa miaging adlaw.
Sa spot report sa Cebu Provincial Police Office nasuta nga nagbarog lang ang biktima sa atubangan sa usa ka restobar sa maong lugar dihang gipusil kini sa suspetsado.
Naigo ang biktima sa iyang hawak ug gihatud dayon kini ngadto sa Vicente Sotto Memorial Medical Center.
Samtang misibat si Juko gamit ang usa ka motor sa wala matino nga direksyon ug padayon kining gipangita karon sa kapolisan. (BANAT NEWS)