Dugang polis ipakatap sa Misa de Gallo sa Lapulapu

CEBU, Philippines - Dugang pwersa sa kapolisan ang ipakatap sa unom ka mga dagkong simbahan sa dakbayan sa Lapulapu atol sa siyam ka adlaw nga misa de gallo.

Matud pa ni Lapulapu City Police Office Director P/SSupt. Rey Lyndon Lawas ipakatap niini ang iyang mga sakop sa TRS ug IDMB nga  magsibilyan lang  ang sapot sa maong  mga  simbahan  nga  mao  ang Regla, Babag, Marigondon, Mactan, Bangka ug  Mactan Air Base.

Gisaug-ulo  na  sa  kapolisan  ang  mga  dagway sa  mga notadong  mangunguot, snatcher ug kawatan aron  dali  ra nilang  masikop.

Gipasidan-an usab ni Lawas ang katawhan nga dili magsul-ob  sa mga mahalong alahas kung mosimba ug moagi sa mga bagang duot sa katawhan aron dili mabiktima.

Iya  usab  nga giawhag  ang mga reisdente nga dili maghurot og gawas sa ilang balay ug kun  maghurot  man kinahanglang  isira  gyud  ang  tanang  pultahan  niini. (BANAT NEWS)