Paghatag og allowance sa mga hukom pag-usik-usik lang

CEBU, Philippines - Pag-usik lang sa pundo sa siyudad sa Sugbu ang gisugyot ni Mayor Michael Rama nga hatagan og dagkong binuwan nga allowance ang mga huwes ingon man sa mga justices sa Court of Appeals.

 Apan gipasalig ni Konsehal Alvin Dizon nga pasabton gyud niya ang mga kaubanan nga usik sa kwarta ang paghatag og dagko kaayo nga allowance sa mga huwes matag buwan nga kaparehas sa binuwan nila nga sweldo. Dunay mga huwes nga nagsweldo og mga P40,000 ang buwan ug mga P60,000 usab sa mga justices.

Gidayeg ni Dizon si Justice Gabriel Ingles ingon man si RTC Judge Meinrado Paredes kay apil kini sa pipila lang ka huwes ug justices nga wala g’yud modawat og allowance gikan sa kagamhanan sa dakbayan.

Si Mayor Michael Rama miingon nga kun adunay kwarta ang dakbayan sa Sugbo ipadayon niya sa paghatag og allowance matag buwan sa mga huwes ug justices nga matud pa niya gisugdan atol sa administrasyon ni kanhi  mayor Tomas Osmeña.

Si Dizon namahayag nga anugon kaayo ang maong kantidad nga ihatag sa mga huwes nga dagko nang daan og sweldo ug duna pa’y ubang mga benipisyo nga gidawat gikan sa Supreme Court. (BANAT NEWS)