CEBU, Philippines - Natigbasan sa usa ka lalaking nalisoan sa pangisip ang usa ka polis ug usa ka tanod nga miresponde sa alarma sa sitio Balao, Sudlon 2 sa dakbayan sa Sugbo sa alas 7:30 miaging buntag.
Ang natigbasan naila nga sila si SPO1 Protacio Meredores, Cebu City Public Safety Company ug si Fiedel Dapar nga usa ka tanod sa barangay Sudlon 2.
Ang suspetsado naila nga si Alcher Albores, 34, molupyo sa maong lugar ug gikataho nga nalisoan sa pangisip.
Sumala pa sa report sa Cebu City Police Office nga mitubag sa alarma si SPO1 Meredores, PO3 Leopoldo Cabase ug sa mga Barangay Public Safety Officer sa Barangay Sudlon.
Matud pa nga usa ka lalaki nga nalisoan sa pangisip ang giingong nanggukod og tawo nga may dalang sundang.
Dihang naabot na sa lugar ang mga awtoridad giduol ni Dapar si Albores apan gitigbas kini sa suspetsado sa tuong abaga, ug kamot.
Si SPO1 Meredores nga nakakita nga gitigbas ang tanod mibunal unta sa iyang baton aron kini ma-neutralized apan daw wala lang maunsa ang suspek ug gitigbas ang maong polis sa tuong kamot ug tuong dapi-dapi.
Diha na nakadesider si SPO1 Meredores paggamit sa iyang .9mm service firearm ug gipusil niini ang tiil ni Albores una pa kini na-neutralized.
Daling gidala sa Regional Health Service 7 si SPO1 Meredores samtang gidala sa Vicente Sotto Memorial Medical Center si Dapar ug si Albores. (BANAT NEWS)