Kasong child abuse gipasaka batok konsehal

CEBU, Philippines - Kasong child abuse maoy gipasaka sa kapolisan batok sa konsehal sa barangay Cambaro sa dakbayan sa Mandaue kinsa gialigar nga midala sa sulod sa motel  sa  upat ka batan-ong  mga babaye ug usa ka lalaki .

Si Senior Inspector Mercy Villaro, hepe sa Women’s section sa Mandaue City Police Office (MCPO) maoy midala sa mga biktima ngadto sa piskalya kagahapon.

Ang  suspetsado  bag-o lang  nanumpa isip konsehal sa barangay Cambaro nga ginganlan og  Jay-r Yosores.

Si Senior Superintendent  Petroneli Baldebrin, director sa MCPO  nga nahinabi sa mga tigbalita miingon nga ang kaso nga consented abduction in relation to Republic Act 7610 o Child Abuse  maoy  ilang gisang-at  batok  sa suspek.

Kini  usa  ka   espesyal nga balaod nga manalipod sa kabataan batok sa sexual abuse, exploitation and discrimination.

Sa  samang  higayon  gusto  usab  sa kagamhanan sa maong dakbayan nga imbestigahon  ang tagdumala sa motel nganong  mitugot  kini  nga  makasulod  ang  mga menor de edad.

Base  sa balaod  usa    ka  dakong  kalapasan  sa balaod  nga  gipatuman  sa kagamhanan  sa siyudad.

Si City Administrator James Abadia miingon nga andam ang kagamhanan sa dakbayan sa pagtabang sa mga biktima nga menor de edad sa serbisyo nga ilang gikinahanglan.

Matud pa ni Senior Inspector Villaro nga  base  sa giasoy sa mga biktima ngadto kanila, ilang nasuta nga nagtinguha diay unta kini  sa pag-solicit og  kuwarta  gikan  sa suspetsado kay  may  apilan  silang sayaw sa eskuwelahan.

Gumikan  sa maong  plano  misugot  sila  nga adto  magsabot    sa  may  reclamation area sa Mandaue.

Dihang nagkita na sila  gidapit dayon  sila  sa piniling  konsehal nga manulod sa motel ug didto gipainom sila og ilimnong makahubog.

Samtang  nagpadayon  og  inom,  nakigdula pa kanila  ang  konsehal  og “truth or dare” nga magpulipuli og tunol sa baso unya mohalok ug makig-lips to lips pa kini         kanila.

Si Deputy Ombudsman for the Visayas Pelagio Apostol nga nahinabi sa mga tigbalita miingon nga kun kapamatud-an, atubangon  sa  suspetsado  ang  kaso  nga  posibling  makapatangtang kaniya  sa puwesto.

Dugang pa niya nga mohimo usab sila og pakisusi sa pagsuta kun gigamit ba sa maong suspetsado ang iyang katungdanan isip konsehal sa barangay sanglit lain na usab kining kaso nga atubangon niya. (/WC)(BANAT NEWS)