1,108 ang mipasar sa civil service exam
CEBU, Philippines - Mokabat sa 1, 108 sa 8,529 ka mga examinees ang mipasar sa Civil Service Examination nga gipahigayon niadtong Oktubre 13 ning tuiga sa Central Visayas.
Sumala pa ni CSC 7 Regional Director Karin Litz Zerna nga mirehistro og 13 porsiyento nga rating ang CSC Professional samtang 12.7 porsiyento usab ang Sub-Professional.
Dugang pa ni Zerna nga adunay 941 sa 7,216 ka mga mikuha og eksaminasyon ang mipasar sa CS Professional Examination samtang 167 usab sa 1,313 ka mga mikuha og eksaminasyon sa CS Sub Professional ang mipasar.
Nagkanayon si Zerna nga ang mga bag-ong eligible sa CSC Professional o Sub Professional ang usa sa mga batakang gikinahanglan alang sa pagbaton og permanenteng trabaho sa natad sa teknikal ug klerikal nga posisyon sa ahensya sa gobyerno.
Gibutyag ni Zerna nga adunay umaabot nga pag-ila sa mga trabaho sa Government Personnel Recruitment and Selection lakip na ang paghatag og mga sertipiko ugma ,Disyembre 9 sa alas 8:00 ang takna sa buntag ug usab ala 1:00 ang takna sa hapon didto mismo sa buhatan sa CSC7 Multi-Purpose Hall, Sudlon, Lahug ning dakbayan sa Sugbo. (/WC)(BANAT NEWS)
- Latest
