Misa de Gallo higpit nga bantayan sa kapolisan

CEBU, Philippines - Unang semana pa lang sa Disyembre apan ang kapolisan sa dakbayan sa Talisay nangandam na  alang  sa Misa de Gallo  sa mga simbahan sugod karong Lunes sa kaadlawon o Disyembre 16, 2013. Si Superintendent Resty Santos, officer-in-charge sa Talisay City Police Station mibutyag sa Banat News nga gipaalerto  niya ang  iyang  mga  sakop  sa mga  tahas  niini

Matud ni Santos nga ang lima ka mga dagkung simbahan  ang  ilang  bantayan  ug destinohan  og  daghang  polis  ang  matag  usa  ka  simbahan pagmentenar sa kahusay ug kalinaw.

Ang maong mga simbahan mao  ang Saint Joseph Parish sa barangay Tabunok, San Isidro Parish sa  barangay San Isidro, Santo Niño Parish sa barangay Mohon, Santa Teresa de Avila sa barangay Poblacion ug Our Lady of Consolacion sa Laray, barangay San Roque.

Matud usab ni Santos nga gawas sa mga polis nga ipakatap  sa nahisgutang simbahan, adunay mga polis usab nga mo-roving tungod kay posibleng ang mga kiriwan molihok usab sa maong panahon.

Ang officer-in-charge nanawagan sa katawhan nga kung mahimo dili biyaan ang ilang mga balay  nga walay mahibilin nga tawo nga magbantay aron dili sila mabiktima sa kawat.

Gipasabot ni Santos nga ang mga kiriwan maniid usab  ug molighot sa pagpangawat kung makakita og higayon.

Gawas niini mipahimangno usab ang OIC nga kung molakaw dili biyaan ang mga appliances nga mag-ungot  sa mga outlet paglikay sa sunog.

Ang mga manimbahay usab giawhag ni Santos nga magmabinantayon tungod kay bisan og naa sa sulod sa simbahan ang mga kiriwan molihok usab  sa pagpangawat o pagpanguot. (BANAT NEWS)