2 gipangluba angol kay giselosan

CEBU, Philippines - Selos ang hinungdan   nga  gipangluba angol  sa usa  ka lalaki  ang  duha ka managsuong  lalaki didto sa Sitio Caimito, barangay Carreta dakbayan sa Sugbo alas 2:30 sa kaadlawon gahapon.

Ang mga  biktimang   managsuon sa inahan  nga sila si Teofilo Macheca, 24, janitor ug si Celestino Agusto, 35, janitor, temporaryo silang nagpuyo sa naasoy’ng lugar.

Samtang ang suspetsado mao si Regan Recolcol, 26, molupyo sa barangay Lorega, San Miguel, dakbayan sa Sugbo. Base sa imbistigasyon nga gihimo nila ni SPO4 Alex Dacua, PO1 Esmer Escultor ug PO1 Reoful Adalim sa Homicide Section sa Cebu City Police Office, nga ang mga biktima nag- inom sa sala sa usa ka boarding house (gipugngan ang ngalan) sa maong lugar kuyog si Angie Salomon nga ilang ka-boardmate. Si Salomon maoy  uyab  ni Recolcol, ang suspetsado  sa maong  krimin.

Sa wala madugay  miabot ang suspetsado sa boarding house uban ang higala niini ug miapil sa inom. Unya  kalit lang  milanit kini  sa iyang  kutsilyo  ug  sa walay igong rason, gipanunggab  ang managsuon sa makadaghang higayon .

Si PO1 Reoful Adalim nahinabi sa Banat News, miingon nga selos ang motibo sa maong  pagpanunggab

Matud pa ni Adalim nga suod nga higala si Salomon ug si Agusto nga maoy hinungdan   nga iyang giselosan kay magsige og sikitsikit ang duha.

Sumala pa ni Adalim, duha ka adlaw sa wala pa  ang hitabo,  nagkalalis ang managtrato gumikan sa selos.

Miingon si  Adalim, nga nagpaabot pa sila sa desisyon sa pamilya sa mga biktima kung mopasaka ba og kaso batok sa suspetsado.

Nakaangkon og samad-dinunggaban si Agusto sa too’ng kamot ug too’ng dughan, samtang sa too ug wa’ng dughan ug too’ng kamot usab si Macheca.

Gihatud  dayon  ngadto   sa Cebu City Medical Center  ang  mga  biktima.

Padayon pang gipangita sa kapolisan ang suspetsado human kini moikyas. (BANAT NEWS)