Ginang nadakpan sa buybust sa PAIDSOTG

CEBU, Philippines - Nagkadaiyang illegal nga drugas nga mobalor sa P25,000 ug mga drug paraphernalia ang nasakmit sa operatiba sa Provincial Anti-Illegal Drugs Special Operation Task Group (PAIDSOTG) sa gipahigayun nga buy bust operation sa miaging gabii sa Sitio Banahao, Barangay Tomonoy, Moalboal.

Ang nadakpan giila nga sila si Nerissa “Ner” Sambilad ug kauban niini nga si Edmer Jauculan. Nakuha gikan sa mga suspek ang duha ka dagko, 12 ka medium ug 16 ka gagmay’ng pakete sa gituohang shabu, P300 marked money, digital weighing scale, mga improvised sealers; disposable lighters, ug plastic filler.

Ang illegal nga drugas anaa na karon sa buhatan sa Philippine National Police Crime Laboratory-7 sa Camp Sotero Cabahug, Cebu City alang sa chemical analysis.

Na-monitor sa kapulisan si Sambilad human masikop ang igsuon niini sa miaging tuig.

“With his arrest ang nakapuli ang iyang igsuon (Sambilad) kay didto man ni gasugod nga dunay nahibilin nga usa ka Tupperware si Tolindoy unya gipa-disposed, nahigam siguro,” tug-an pa ni SPO1 Reynaldo Solante, team leader sa mga operatiba.

Human matunol sa poseur buyer ang P300 bugti sa gagmay’ng pakete daling gisikop ang duha. Si Solante midugang nga misiaw sa pagpamaligya si Sambilad kay pista man karon sa maong barangay.

Si Supt. Rodolfo Albotra, hepe sa Provincial Intelligence Branch, mitug-an nga level three nga pusher si Sambilad ug lugar niini ang Badian ug silingang dapit.

“Sa among investigation iyang ngalan gyud ang mugawas, tunog na kaayo,” si Albotra mibutyag. Ang mga suspek anaa na karon sa karsel sa Consolacion Police Station ug pasakaan og kasong  kalapasan sa Sections 5 ug 11 sa RA 9165 o Dangerous Drugs Act of 2002. (BANAT NEWS)