Nasingki sa trak napasok, nalatayan

CEBU, Philippines - Patay diha-diha ang 28-anyos nga lalaki human kini malatayi sa ligid sa trak nga iyang na-engkwentro kagahapon pasado  alas 11:00 sa buntag diha sa dalan H. Abellana, barangay Canduman, dakbayan sa Mandaue.

Ang biktima giila nga si Joven Leo Enriquez Suico, taga barangay Tabok, Mandaue ug drayber sa Suzuki nga motorsiklo nga nagtangag sa plakang 8655-GQ.

Ang drayber sa Fuso Fighter truck nga nagtangag sa plakang GEF-723 nga dunay kargang mga square-bar nga si Romulo Contredas Delgado, 50, nagtingkagol sa detention cell sa Station 6 sa Canduman Police Station.

Si PO2 Ruben Cardeña sa Mandaue City Traffic Division mibutyag sa Banat News kagahapon nga ang nahisgutang duha ka mga sakyanan nagbiyahe kini sa parehong direksiyon diha sa Canduman paingon unta ngadto sa Talamban.

Pag-abot diha sa lugar nga nahitaboan libaongon ang karsada hinungdan nga naglikay-likay ang motorsiklo apan nagkasingki kini sa trak ug napasok sa ilawom hinungdan nga naligsan sa tuong luyo nga ligid.  (BANAT NEWS)