12 ka balay naugdaw

CEBU, Philippines - Naugdaw ang 12 ka panimalay nga ginama sa light materials ug usa ka tawo ang naangol sa sunog nga nahitabo sa  sitio Kagudoy sa barangay Basak, dakbayan sa Lapu-Lapu kagahapon sa kaadlawon.

Si FO1 Jonalice  Alcayra sa Bureau of Fire Protection (BFP) sa maong dakbayan nga nahinabi sa Banat News miingon nga ang kalayo unang nagsugod sa sulod sa lawak sa panimalay nga gipuy-an ni Gina Cuenca ug dali kini nga mitapon sa mga sikbit niini.

Matud pa ni Alcayra usa ka Cesar Molina ang napaso sa abaga tungod sa pagsulay niya pagpawong sa sunog.

Dugang pa niya nga lakip sa naugdaw nga mga panimalay nga kasikbit sa nasunog nga panimalay ni Cuenca mao ang ang gipanag-iya nila ni Marcelo Lahoylahoy, Cesar Molina, Inocentes Timtim, Hyce Seguerra, Jean Seguerra, Loyloy Lascota, Moreno Ondoy, Gina Natividad, Grace Ondoy, Eugene Segabon ug Ramon  Matelito. Mokabat sa P450,000 ang gibiling danyos sa maong sunog ug gipaubos kini nila sa 2nd alarma ang maong sunog nga nahitabo apan nakontrolar lang og walo ka minutos.

Gituohan nga faulty electrical wiring ang hinungdan sa maong sunog apan nagpadayon pa ang arson investigation sa maong hitabo. (BANAT NEWS)