Gipamusil 2 patay

CEBU, Philippines - Duha ang patay ug tulo ang angol apil ang usa ka bata sa usa ka pamilya nga gikan sa diskohan human sila gipamusil sa wala pa mailhing mga lalaki nga nangatang kanila sa sitio Lubas I sa barangay Campo 7 sa lungsod sa Minglanilla sa alas 11:30 sa miaging gabii.

Ang nakalas naila nga ang managsuong sila si Rene Secretaria, 20, ug si Julius Secretaria, pulos molupyo sa maong dapit.

Samtang naangol ang igsuon sa mga namatay nga si Jojo Secretaria, 33, ilang amahan nga si Danilo Secretaria, 57, ug ilang pag-umangkon nga 7-anyos, molupyo sa samang lugar. Matud pa ni PO2 Vincent Aliñabo nga nahinabi sa Banat News nga ang mga biktima gikan sa usa ka disco tungod kay fiesta sa ilang lugar apan sa ilang pagpanguli giatangan sila sa duha ka wa mailhing mga lalaki ug kalit nga namusil kanila.

Samdan si Rene sa iyang liog ug sa wala ug tuo niini nga tiil, samtang  ang bata samdan sa iyang tiyan ug sa iyang wala nga bukton, nakaangkon sab ug samad sa iyang tiil si Danilo nga amahan sa mga biktima.

Sumala pa ni Aliñabo nga samdan sa iyang tuong nawong ug tiyan ang biktima nga si Jojo apan nakadagan kini ug nakatago sa punoan sa manga ug wala na kini makit-i sa mga suspetsado. Matud ni Aliñabo nga ang duha ka polis nga na-assign nga mobantay sa diskohan nga sila si PO3 Humprey Alpas ug si PO2 Omar Parages nga nakabantay nga dunay buto-buto nga nahitabo dali nga miresponde sa gigikanan sa buto.

Dugang ni Aliñabo nga dihang naabot na ang mga polis sa crime scene gipabuthan sila sa duha ka mga suspetsado busa mibalos sila sa pagpusil apan walay naigo niini.

Daling gidala sa mga polis sa Minglanilla District Hospital ang mga biktima apan gideklarar nga dead on arrival ni Dr. Lowell si Rene, sumala pa ni Aliñabo.

Samtang patay na usab nga nadangat sa Vicente Sotto Memorial Medical Center si Julius kinsa gidala sa mga higala sa maong tambalanan matud ni Aliñabo. Padayon ang imbestigasyon sa pag-ila sa duha ka mga suspetsado ug sa motibo sa pagpamusil.  (BANAT NEWS)