Gipusil angol sa silingan

CEBU, Philippines - Naangol ang usa ka tawo nga gipusil sa bukobuko sa iyang silingan sa sitio Tunga, barangay Caubyan sa isla sa Olango sa dakbayan sa Lapulapu  kagahapon sa alas 3:00 sa  hapon.

Ang biktima mao si Rizaldy Abojos, 44, ulitawo, ug  ang suspetsado nga nagpusil  mao si Dominic Abano, 39, ulitawo ug pulos nagpuyo sa nahisgotang dapit. Si PO1 Jomar Tolentino sa homicide section sa kapolisan sa maong dakbayan nga nahinabi sa Banat News miingon nga nagkatagbo ang biktima ug suspetsado sa usa ka tindahan sa maong dapit ug nagkasinukmatay sa karaan nilang bangi. Matud pa ni PO1 Tolentino nga sa maong pagsinukmatay  miinit  ang  ilang lalis. Ang suspetsado nga nagluklok  og armas de fuego  milanit  niini  ug  ang  biktima  nga  nakuyawan  misuway  og  dagan apan  gipusil  kini  ug  nasabak  sa   buko-buko.

Human  masabak  ang  biktima mipahilayo  dayon  ang  suspek  apan nasakpan  siya sa kapolisan  nga  migukod  kaniya

Ang biktima dali nga gidala sa district  hospital sa barangay Sta. Rosa sa nahisgotang  isla apan tungod kay grabe  iyang kahimtang, hinungdan nga gibalhin kini sa Vicente Sotto Memorial Medical Center sa dakbayan sa Sugbo.

Gipangitaan  sa armas  nga  gigamit  sa pagpusil  apan  gilabay  kini  sa suspek  busa  wala  na  hikit-i  sa kapolisan.

Nagtingkagol  na  siya  karon  sa prisohan sa kapolisan  sa maong dakbayan. (BANAT NEWS)