Trak midaro sa internetan 2 patay

CEBU, Philippines - Duha ang patay ug 14 ang angol human malimbuwad ang usa ka delivery truck nga midaro sa usa ka balay, tindahan ug computeran sa barangay Sta. Ana sa lungsod sa Barili kagahapon sa alas 6:30 sa buntag.

Sumala pa ni PO2 Gilbert Encabo nga nahinabi sa Banat News nga patay diha-diha ang usa ka Anderson Vergara, 11 ug si Jennifer Martilian, 22, nga mga molupyo sa Sta. Ana sa lungsod sa Barili.

Samtang ang drayber sa maong trak naila nga si Adonis Quiñanola, 37, lumad nga taga-dakbayan sa Ilo-ilo.

Sumala pa ni Encabo nga gawas sa duha nga nakalas angol sab ang 14 ka mga tawo sa maong aksidente lakip na nila John Phillip Gorro, 5 anyos ; Franklin Gorro, 14; Maria Flordeline Gorro, 7; John Carlo Gorro, 6; Mary Joy Gorro, 4; Larry John Martillan, tulo ka bulan; Michael Silituna, 11; Florencio Silituna, 48; Romeo Bayabos, 53; Jude Martin Buhay, eight years old; Jose Aguilar, 53; Joshua Vergara, 14; Roque Vergara, 9, nga molupyo sa maong barangay

Sagad sa mga bata nga naangol didto  sa internet café nga nagdula og on-line games samtang ang uban naglakaw lang sa dalan.

Samtang angol usab ang helper sa drayber nga si Elmer Culango, 20, sa Tipolo sa dakbayan sa Mandaue  ug sa usa nila ka pasahero nga si Rose Mae Libante, 35, molupyo sa dakbayan sa San Carlos sa Negros Oriental.

Sumala pa ni Encabo ang drayber mibutyag nga nag-malfunction ang brakes sa iyang trak nga maghatud unta og kinahon nga beer sa lungsod sa Malabuyoc.

Matud pa ni Encabo dulhogon ug kurbadahon pa gyud ug duol sa taytayan ang nahitaboan.

Ang hepe sa Barili Police Station nga nahinabi sa The Freeman/Banat News nagkanayon nga unang naigo ni Quiñanola ang usa ka multicab nga nag-parking duol sa tindahan ug midiretso sa internetan nga gipanag-iya ni Edmond Concepcion.

"Ang internet cafe made of light materials unya guba gyud kaayo nagdagan pa na sa wa pa kahunong mga five to 10 meters away," matud pa ni Arbuis

Sumala pa ni Arbuis nga si Martilian nagbarog daplin sa dalan nga nagkugos sa iyang tulo ka bulan nga anak ug dihang naigo siya sa trak nalabay ang iyang gikugos nga bata nga naangol usab.

Samtang si Vergara nagduwa sa internetan dihang naigo siya sa trak nga maoy hinungdan sa iyang hinanali nga kamatayon.

Wa usab makabantay ang ubang mga tawo nga nag-tambay sa maong lugar hinungdan nga nadaro sila og apil sa trak ug nadat-ogan sa mga kinahon nga beer.

“I-check namo ang tangke sa hangin unya gisubay namo ang hose sa chassis ngadto sa foot brake nga possible nagasgas unya nabuslot maong wala kasugakod,” matud ni Arbuis.

Ang inahan sa usa sa mga naangol Maria Marta Selituna nga nahinabi sa Banat News miingon nga naglakaw lang ang iyang anak daplin sa karsada dihang kalit kining natabunan sa mga kinahong beer.

Panawagan sa maong inahan nga abagahon unta sa kompanya sa delivery trak ang galastohan sa pagpatambal sa iyang anak tungod kay lisod gyud ang iyang kahimtang. (BANAT NEWS)