Mga bakwit nagkagamay

CEBU, Philippines - Nagkagamay na lang ang mga bakwit nga gikan sa dakbayan sa Tacloban nga anaa nagpabilin sa upat ka evacuation centers dinhi sa dakbayan sa Sugbo.

Basi sa talaan  sa command center sa City Hall miabot na lang og 321 ka tawo ang nagpabilin sa mga evacuation centers.

Ang sports complex sa Barangay Tinago gipuy-an na lang karon sa 156 ka bakwit, ang Guadalupe Sports Complex adunay 57, ang Cogon-Ramos gipuy-an pa og 42 ka tawo samtang 66 ang pabilin pa nga nag-estar sa Capitol Parish Multi-Purpose Center.

Sa miaging semana miabot og dul-an sa usa ka libo ka bakwit ang miestar sa unom ka evacuation centers dinhi sa dakbayan. Ang duha ka evacuation center didto sa Barangay San Nicolas ug San Roque gisirad-an na ug giipon ang ubang mga bakwit didto sa upat ka evacuation centers.

Nasayran nga ang ubang mga bakwit namiya na kay gikuha sa ilang mga paryente samtang ang uban milarga paingon sa Manila luwan sa C-130 Plane sa Philippine Air Force.

Ang mga bakwit nangabot dinhi sa Sugbo kay wala na makaantos sa grabe nga kabaho didto sa Tacloban tungod sa daghang patay ingon sa kanihit og pagkaon ingon man tubig nga mainom human sa bagyo nga miguba sa ilang mga balay.

Kapin na sa 4,000 ka patay ang naugkat gikan sa lainlaing dapit sa Tacloban nga giayo’g kuso-kuso sa kusog nga bagyo ingon man sa tubig-dagat nga misuyla ngadto sa kabalayan. (BANAT NEWS)