Mayoriya sa barangay officials sa Naga nagpabilin sa Alayon
CEBU, Philippines - Tanang barangay sa siyudad sa Naga nagpabilin gihapon sa Partido Alayon pinangulohan ni kanhi kongresista Eduardo Gullas sumala pa ni Mayor Valdemar Chiong. Niadtong Miyerkules sa hapon ang 28 ka mga kapitan sa kabarangayan sa siyudad ug 196 ka mga kagawad ang mihural ngadto kang Kongresista Gerald Anthony “Samsamâ€Gullas, Jr.
Ang maong kalihukan gipahigayon diha sa sports complex sa Naga atubangan sa mga opisyal sa siyudad pinangulohan ni Chiong ug ni kanhi kongresista Eduardo Gullas.
Si Chiong nga nahinabi sa mga tigbalita nagkanayon kini nga nalipay sila nga ang 28 ka kapitan nga ilang gipaluyohan maoy midaog sa milabay’ng eleksiyon sa barangay.
Matud ni Chiong nga nagpasabot kini nga dako ang pagsalig sa katawhan ngadto kanila. Apan nabantayan hinuon nga dunay mga barangay nga dili kompleto ang mga kagawad nga mihural, nasayran nga dunay walo ka kagawad ang dili kaalyado sa Alayon.
Gibutyag sa mayor nga ang presidente karon sa Association of Barangay Captain (ABC) sa Naga nga si Aurillo Alinsonorin mao gihapon ang ilang suportahang ituboy isip presidente sa ABC. (BANAT NEWS)
- Latest
