Mga depektosong makaon gilain sa DSWD

CEBU, Philippines - Nagtipun-og   ang mga sinakong   botelya  sa catsup,  mantika  nga  gisulod  sa plastic, ug mga delatang nangalumping nga wala  ilakip  sa pagputos sa mga relief goods  alang  sa  mga biktima sa bagyong Yolanda.

Matud pa ni Clarence Enoferio ang duty Head sa DSWD nga nadistino sa Mactan Benito Ebuen Air Base   nga wala sila’y dautang intensiyon sa mga relief goods gikan sa gawas sa nasud.

Gituyo  niya  pagpasil-ing  sa Banat News  ang  maong  mga  butang aron masaksihan ang  ilang  gihimo.

Ubay-ubay   ang  mga  sinako  sa binotelyang catsup  ang ilang gihipusan gumikan kay delikado kini kung ideretso paghatag ngadto sa mga biktima sa kalamidad.

Samtang lakip sa mga relief goods nga gikan sa Indonesia   may mga mantika  nga  gisulod   sa usa ka plastic  pouch.

Gihiklin  usab  kini  sa DSWD  kay  delikado   kun  mobuto kini sulod sa mga sako apan  ila kining  isumiter ngadto sa ilang rehiyonal nga buhatan. Ang mga delatang nalumping  ila  usab   nga  gilain kay  ang uban niini dili na angayang kaonon kay  mihungaw na.

Gipanghimakak ni Enoferio nga gipangawat ang mga relief goods nga gikan sa ubang kanasuran.

Pipila ka reklamo ang nadawat sa media nga matud  pa nawagtang ang mga binotelyang  catsup nga gikan sa gawas sa nasud. (BANAT NEWS)