71 ka polis sa CCPO ug CPPO wala motuman sa mando sa PRO7

CEBU, Philippines - Setentay-uno ka mga polis sa dakbayan ug lalawigan sa Sugbo ang ipaubos sa pre-charge investigation human napakyas sa pag-adto sa lalawigan sa Bohol sa milabay nga special barangay election niadtong Domingo.

Ang Regional Director sa Police Regional Office 7 Chief Supt. Danilo Constantino mimando nga paimbestigaran sa City Director sa Cebu City Police Office ug sa Provincial Director sa Cebu Provincial Police Office tungod kay gikan man sa probinsya ug dakbayan ang maong mga polis.

Matud ni Constantino seryoso nga kalapasan ang ilang nabuhat tungod sa wala pagsunod sa ‘lawful order’ gikan sa ilang labaw.

Sumala pa ni Constantino nga subpoenahan ug patubagon ang maong mga polis aron mapasabot nila nganong napakyas sila sa pagtuman sa kamandoan nga paadtoon sila sa Bohol.

Kung masuta nga igo ang mga rason sa maong mga polis mag-atubang sila og kaso nga administratiba nga Serious Neglect of Duty ug hayan mag-atubang kini og silot.

Ang City Director sa Cebu City Police Office nga si  Sr. Supt. Noli Romana nga nahinabi sa mga tigbalita miingon nga automatic nga iyang ipa-imbestigar ang mga polis nga wala moadto sa Bohol.

Matud ni Romana nga 250 ka mga polis ang gi-augment gikan sa CCPO nga gipakatap ngadto sa Bohol apan ang uban niini napakyas sa pagtuman sa maong kamandoan.

Ang maong mga polis kabahin sa 1,155 unta ka mga polis nga ipakatap sa Bohol . (BANAT NEWS)