2 notadong tulisan nasikop sa tanod
CEBU, Philippines - Nasikop sa mga barangay tanod ang duha ka mga lalaki nga giingong mga notadong tulisan sa dalan Macupa, barangay Basak San Nicolas sa dakbayan sa Sugbo sa alas 9:00 sa miaging gabii.
Ang mga nasikop naila nga sila si Alvin Aligato, 18, ug Michael Ramos Asombro, 18, molupyo sa barangay Quiot, sa dakbayan sa Sugbo.
Si PO2 Albert Sator, imbistigador sa Mambaling Police Station nga nahinabi sa Banat News miingon nga ang duha notado na nga tulisan ug daghan na ang mga mireklamo batok kanila.
“Ang duha notado nga tulisan, daghan na ni sila complaint,†sumala pa ni Sator.
Matud pa ni Sator nga ang mga tanod sa barangay Basak San Nicolas maoy nakadakop sa duha.
Sumala pa, nga nag-roving ang mga tanod sa barangay Basak San Nicolas dihang may usa ka concerned citizen ang mireport kanila nga may duha ka mga lalaki nga kadudahan ang lihok.
Busa daling giadto sa mga tanod ang mga lalaki nga gihulagway sa usa ka concerned citizen.
Dihang nakabantay ang duha dali kini nga mikaratil og dagan padulong sa Don Vicente Rama Elementary School, sumala pa ni Sator.
Gigukod sa mga tanod ang duha ug didto na ni nila na-corner duol sa maong eskuwelahan.
Nasakmit gikan sa duha ang usa ka 13 pulgadas nga kutsilyo ug 13 ka pulgadas nga ice pick, ug tunga nga upos sa marijuana.
Matud pa ni Sator nga gipasakaan na og kaso kagahapong adlawa ang duha ka mga suspetsado. (BANAT NEWS)
- Latest
