Cebu mi-supply og kuryente sa Bohol

CEBU, Philippines - Bisan sa kakulang sa suplay sa kuryente sa Cebu, apan  misuplay   kini  og  elektrisidad ngadto  sa lalawigan  sa Bohol  pinaagi sa Ormoc-Maasin submarine cable, atol sa ilang gipahigayon nga barangay election kagahapong adlawa.

“This is what we called sharing system. Bisan kuwang ang supply of power sa Cebu, still Cebu shared," matud pa ni DOE-7 Regional Director Antonio Labios sa gipahigayon nga press briefing kagahapong adlawa.

Matud pa ni Labios nga adunay 23 megawatt  ang maong submarine cable, diin 19 megawatt niini ang gi-supply sa Bohol.

Ang Bohol, sukad  ayaga  sa  7.2 magnitude nga linog  niadtong  Oktubre 15, 2013,   nawad-an  na  og supply sa  kuryente.

Nasayran  nga  ang  ilang  supply  sa elektrisidad  naggikan   sa Leyte  ug    ang mga transmission lines sa National Grid Corporation of the Philippines (NGCP)  nga  tinubdan  sa sugang  dagitabnon  sa Bohol, nangaguba usab  atol sa linog.

Apan tungod kay na-restored ang linya sa Cebu-Leyte grid, mao kini hinungdan nga nahatagan na og kahayag ang mga Bol-anon ilabina sa kagabhion. (BANAT NEWS)