Libreng sakay nagpadayon sa Mandaue

CEBU, Philippines - Nagpadayon ang  kagamhanan  sa dakbayan  sa Mandaue  sa  gitanyag niining  libreng sakay  alang niadtong moadto sa bag-ong merkado sa sitio Tribunal sa barangay Centro, sa maong  dakbayan.

Nunot usab kini sa hingpit na nga pagbalik sa pagpahimutang sa mga manindahay nga nag-ukopar og mga stall sa maong merkado.

Gisuspenso  makadiyot  ang  operasyon   sa  mga  vendor  kinsa  mibiya  sa  ilang  mga  puwesto human  sa nasinati  nga  kadaot sa edipisyo  sa  merkado gumikan  sa pagtay-og sa 7.2 magnitude nga linog niadtong Oktubre 15 niining tuiga.

Si  Mandaue City Public Administrator Mosuline Suliva mibutyag  sa Banat News  nga ang libreng sakay nga ilang gipasiugdahan pinaagi  sa gipadagan sa kagamhanan sa maong dakbayan nga duha ka electric car nga nagbiyahian sa sitio Tribunal. Kini  aron  sa paghatag og kasayon sa mga mangomprahay sa merkado  aron  may  kita  ang  mga  naninda  sa  maong  merkado.

Ang nahisgotang electric car nga nagdagan maoy nagsilbing kasakyan sa mga mangompra gikan sa bag-ong merkado paingon  sa luyong bahin sa city hall. Gikan  sa city hall  molahos  ngadto sa dalan A. del Rosario ug motuyok na sa dalan J.M Ceniza agi sa karaang merkado publiko  sa dakbayan.

Adto  usab  makasakay  ang mga tawo nga mopaingon sa bag-ong merkado sa sitio Tribunal sa barangay Centro.

Si Roger Paller nga maoy tigpamaba sa kagamhanan sa maong dakbayan nga nahinabi sa Banat News  miingon nga ang mga manindahay nga kanhi nag-ukopar sa bag-ong merkado publiko nga nakasinati og kadaut human sa 7.2 magnitude nga linog, temporaryo karong  gipahimutang sa mga bakanteng luna sa gawas nga bahin niini.

Dugang pa niya nga kabubut-on  na lamang sa kagamhanan ang pagpahimutang sa mga stall nga gitukod sa gawas   sa merkado  nga  naglakip sa isdaan, bugasan ug tindahan sa mga utanon.  (BANAT NEWS)