Evacuees sa Lapulapu nalipay sa kadaugan ni Pacman
CEBU, Philippines - Kung dunay nalipay, duna say naguol nga mga evacuees sa dakbayan sa Lapulapu sa dihang gipahibalo sila nga matunong ang pagbiya nila padulong sa kaulohan luwan sa C-130 sa Philippine Air Force sa oras mismo sa away ni Manny “Pacman†Pacquiao ug Brandon Rios kagahapon.
Apan ang nabiling 100 nalang ka buok nga evacuees sa Brgy. Looc ug Brgy. Gun-ob evacuation centers nagmaya sila samtang nagtan-aw sa libreng pay-per-view kortesiya ni Mayor Paz Radaza. Sa matag bukbok ni Pacquiao kang Rios nakalimtan sa mga evacuees ang trahedya sa ilang dapit didto sa Leyte nga maoy dakong naapektuhan sa bagyong Yolanda. Sa kadaugan ni Pacman pipila ka mga evacuees ang naglaom nga tumanon niini ang iyang saad nga tabang ug pagbisita sa ilang lugar.
Gawas sa paghatag kanila og kahigayonan nga malingaw sa gikahinaman nga comeback fight ni Pacquiao, gihatagan usab sila og libreng pagkaon, softdrinks, coffee ug bugnaw'ng tubig nga mainom.
Si SPO1 Edwin Monteroso sa Lapulapu City Police Office nga nahinabi sa Banat News miingon nga nakahatag gyud og kalingawan sa mga biktima sa bagyong Yolanda si Pacquiao kagahapon. Gani ang kadalanan sa siyudad sama sa ubang mga dalan sa Metro Cebu namingaw sa mga sakyanan tungod kay nitutok ang tanan sa sangka ni Pacquiao ug Rios.
Si SPO1 Larry Wagwag sa kapolisan sa lungsod sa Cordova nga nahinabi sa Banat News miingon nga nanghunong og makadiyot sa ilang pagbiyahe ang mga traysikol ug traysikad drayber.
Samtang si PO2 Mervin Candido nga radio operator sa Mandaue City Police Office nga nahinabi sa Banat News miingon nga sa unom ka presinto sa kapolisan sa dakbayan ang mi-report nga sukad sayo sa buntag hangtod nga nahuman ang away ni Pacquiao ug Rios wala siya makadawat og alarma. (BANAT NEWS)
- Latest
