Tulo ka lotto outlets nailad

CEBU, Philippines - Nabiktima sa pagpangilad ang tulo ka lotto outlet sa dakbayan sa Sugbo sa wala mailhing babaye nga mi-claim sa iyahang daog sa miaging gabii.  Ang maong mga lotto outlets nahimutang sa Lahug, Banawa ug Hipodromo nga gipanag-iya ni Marivic Ventura.

Sumala pa ni PO2 Reynaldo Labating sa Theft and Robbery Section sa Cebu City Police office nga nahinabi sa Banat News nga ang tulo ka mga lotto outlets giilad sa usa ra ka tawo.

Matud pa nga modus sa maong babaye nga magpaka-aron ingnon nga nakadaog og upat sa ticket sa lotto ug manghuwam kini og cellphone sa teller sa lotto outlet.

Sumala pa ni Labating nga ang maong babaye gikataho nga mo-text nga siya ra pud ang mobalos niini ug matud pa nga moingon siya sa text nga gikan sa pikas outlet nga ipahatag lang ang kwarta nga premyo niini tungod kay atua na nila ang iyang winning ticket ug kulang lang sila sa kwarta.

Ang tellers sa tulo ka outlet nga gipanag-iya ni Ventura nailad gyud sa maong babaye tungod kay disente man kini mamarog.  

Ang maong mga tellers mao sila si Chinbee Pejama, 24, residente sa Brgy. Babag I, teller sa lotto outlet sa Lahug Branch. Jayjay Macapagal, teller sa lotto outlet sa Banawa Branch, nagpuyo sa sitio Lower, barangay Lahug ug Evangeline Villarte, 27, nagpuyo sa Chinese Cemetery, barangay Hipodromo, teller sa lotto outlet sa Hipodromo Branch.

  Base sa imbestigasyon sa kapolisan si Pejama, teller sa lotto outlet sa Lahug Branch, mibutyag nga adunay desenteng babaye nga mi-claim nga nakadaog siya sa four lotto tickets, apan mibalibad si Pejama kay wala kaabot ang iyang kwarta og 9,000 pesos.

Tungod niini nanghuwam ang babaye sa cellphone sa teller ug kunohay gi-textsan ang teller sa laing branch nga mao si Macapagal ug Villarte ug ang duha kuno miingon nga pahatagan lang siya sa iyang nadaog nga P9,000 kay short sila sa kwarta.

Apan human kang Pejama, nagbalhin-balhin ang suspek sa outlets nila ni Villarte ug Macapagal nga susama usab ang diskarte hangtud nga nakakuha siya tanan og dul-an P29,000 ang nakuha sa babaye.   Gisusi karon sa mga imbestigador kung inside job ang nahitabo kay usa ra ka tag-iya ang gi-target.  (BANAT NEWS)