MCIA expansion project aprubado na sa NEDA

CEBU, Philippines - Mas molapad  ug mas modaghan pa unya ang makatugpa sa tugpahanan sa Mactan syudad sa Lapu-Lapu pipila ka tuig gikan karon. Kini human giaprobahan na ni Presidente Benigno Aquino III nga maoy naglingkod isip chairman sa National Economic and Development Authority ang 17.5 bilyones pesos nga Mactan Cebu International Airport Expansion.

Ang maong proyekto nalakip sa pito ka mga major infrastructure projects nga mokabat sa 184.2 bilyones pesos apil na ang public-private partnership scheme project sa gobiyerno.

Gipahibawo ni Michael Arthur Sagcal, tigpamaba sa Department of Transportation and Communication kon DOTC, ang nahisgutan nga projection sa MCIA naglangkob sa construction sa bag-ong passenger terminal, renovation sa existing terminal, operation and maintenance sa bag-o ug existing nga terminals sa kinatibuk-ang concession period ug relocation sa Philippine Air Force facilities.

Si Sagcal nagkanayon nga ang DOTC mohatag sa mga prequalified bidders sa MCIA expansion project hangtud sa Nobiyembre 28 ning tuiga sa pagsumiter sa technical and financial bids niini.

Samtang si DOTC Under Secretary Jose Perpetuo Lotilla nisugyot ngadto sa mga qualifying bidders nga ang pagduso sa ilang mga bids itakda usa ka semana human sa confirmation sa NEDA sa revised concession agreement.  Una nang nipagawas ang DOTC sa General Bid Bulletin 23-2013 nga naglangkob sa mga kausaban sa concession agreement aron ang maong proyekto sagupon sa interesadong mga kompanya.

Ang maong kausaban naglangkob sa paglugway sa gitas-on sa concession gikan sa 20 ka tuig ngadto na sa 25 ka tuig, pagbalhin sa operation and maintenance sa aprons ngadto sa concessionaire, flexibility sa implimentasyon sa augmentation capacity, sharing sa liability for real property tax ug ang pagsaka sa duration period alang sa prohibiting competing airports gikan sa napulo ka tuig hangtud na sa 20 ka tuig. (BANAT NEWS)