Presyo sa forest products gimonitor usab sa DENR

CEBU, Philippines - Bisan pa sa kadaku sa panginahanglan sa mga plywood, lawanit ug uban pang forest products aron sa pagtukod og usab sa mga kabalayan human gigusbat ni bagyong Yolanda, ang Department of Environment and Natural Resources-7, wala pay nakita sa pag-umento sa mga presyo niini.

Matud pa ni DENR-7 information officer Eddie Llamedo, nga ang DENR-7 nimugna na og Regional Price Monitoring Team aron sa pagsuta sa mga presyo sa prime forest commodities.

Matud pa ni Llamedo nga kini aron masumpo ang mga negosyante nga mo-overprice sa maong produkto.

“This is a preventive measure in order to frustrate businessmen who have been trading or selling lumber pieces and other forest products by taking advantage on the calamities that recently struck the Central Visayas region by raising up the prices of these types of products,” matud pa ni DENR-7 regional executive director Isabelo R. Montejo.

Dugang pa ni Montejo nga sa pagkakaron, wala pa sila’y nadawat nga reklamo sa publiko kabahin sa overpricing sa maong mga forest  products.

"I urged the consumers to report immediately if there are certain lumber dealers or retailers that exploit the situation to the DENR 7 by calling the numbers 3461002 or 3453959," dungag pa ni Montejo.  (BANAT NEWS)