Lalaki giputos gitambog sa dagat
CEBU, Philippines - Nakit-an ang patay’ng lawas sa usa ka lalaki nga gituohang gi-salvage nga naglutawlutaw sa baybayon sa barangay South Poblacion, lungsod sa San Fernando niadtong Biyernes pasado alas 8:00 sa buntag.
Usa ka sakop sa Bantay Dagat nga si Sofronio Alfeche ang nakakita sa patay’ng lawas ug daling mipahibalo kabahin niini sa San Fernando Police Station. Sigun sa pasiunang imbestigasyon sa kapolisan nga gipangulohan nila ni SPO1 Francisco Salubre, PO3 Julius Cesar Parages ug PO1 Rodjie Alicaway, nga nakit-an kining maong lawas tulo ka kilometros gikan sa baybayon.
Si SPO2 Victor Cuyno, sa San Fernando Police Station nga nahinabi sa Banat News miingon nga ang maong lawas giputos og tarpaulin ug gihigtan sa pisi.
Sumala pa ni Cuyno, nagsul-ob og orange nga t-shirt ug maong shorts ang patay nga lawas, gibaatan ang baba niini og labakara ug gihigtan kini gamit ang masking tape ug giposasan ang duha ka kamot.
Matud pa nga may nakit-an usab nga samad sa tuong bahin sa ulo sa patay’ng lawas ug gidudahang pila na kini ka adlaw nga naglutawlutaw sa baybayon.
Matud pa ni Cuyno nga wala sila’y mga nakuhang dokumento aron mailhan ang patay’ng lawas.
Hangtod karon wala pa’y nikuha sa patay’ng lawas nga kasamtangang naa karon sa Tupas Funeral Parlor, siyudad sa Carcar. (BANAT NEWS)
- Latest
