23-anyos gipatay sa uyoang ex-convict

CEBU, Philippines - Patay ang usa ka 23-anyos nga lalaki human kini unaya sa pagpusil sa iyang uyoan nga ex-convict niadtong Huwebes sa alas 7:30 sa gabii diha sa sitio Crusher, barangay Lawaan III, dakbayan sa Talisay.

Ang biktima mao si Joseph Karl Fuentes Algabre, residente sa maong dapit nakaangkon og samad pinusilan sa ulo dapit sa tuong bahin sa dunggan dali kining gidala ngadto sa Talisay City District Hospital apan gibalhin kini ngadto sa Vicente Sotto Memorial Medical Center.

Si PO3 Benedicto Lasque kinsa usa sa miresponde sa maong insidente mibutyag sa Banat News kagahapon nga si Algabre nakabsan sa iyang kinabuhi pasado alas 9:00 sa gabii sa nahisgutang adlaw sa VSMMC.

Ang suspetsado mao si Lovewyen Cabusas, 29, residente usab sa nahisgutang barangay ug uyoan sa biktima nga daling misibat human sa insidente ug padayong gipangita sa kapolisan.

Ang kapuyo ni Algabre mibutyag sa mga polis nga ang biktima gitawag kini sa suspetsado ug pila ka minutos ang nakalabay nakabati na lang siya og buto sa armas ug sa iyahang pagsusi nagbuy-od na diha sa yuta ug naligo sa kaugalingong dugo ang biktima.

Gituohan sa mga polis nga bangi tali sa iyang mga paryente ang usa sa hinungdan sa maong hitabo. Matud ni Lasque nga si Cabusas usa ka parolado diin napriso kini sulod sa siyam ka tuig ngadto sa National Bilibid Prison tungod usab sa iyang pag-unay og patay kaniadto sa iyang uyoan.

Gibutyag usab ni Lasque nga nakadawat sila og report nga si Algabre nga may pagka-badlongon kini sa ilang lugar ug nakadispalko kini og kwarta sa iyahang paryente.

Giingong ang mga paryente ni Algabre mosumbong ngadto sa suspetsado kung ang biktima dunay gihimong pabadlong. (/EIM)(BANAT NEWS)