Nakadispalko og P4.1m

CEBU, Philippines - Usa ka lalaki ang nasikop pinaagi sa citizen’s arrest human wala kini maka-remit sa iyang obligasyon nga mokabat og P4.1 ka milyon.

Ang suspetsado naila nga si Niel Niño Huele, 23, molupyo sa F. Gonzalez compound, barangay Kamputhaw sa dakbayan sa Sugbo.

Samtang ang mireklamo sa suspetsado mao sila si Marve Prestine Degollacion, 25, negosyante, molupyo sa barangay Pajo sa dakbayan sa Lapu-lapu; Charlie Bryan Go, 23, negosyante, molupyo sa dalan Pres. Quezon sa barangay Mabolo ug si Deborah Tiu Uy Matiao, 30, negosyante molupyo sa San Vicente Village sa dakbayan sa Mandaue.

Matud pa nga ang suspetsado maoy Purchasing Officer sa mga biktima nga tag-iya og gasoline station sa dakbayan sa Mandaue ug Lapu-lapu.

Nahibulong na lang ang mga biktima nga bisan og naka-isyu na sila og tseke apan walay lana nga miabot sa ilang gasoline station.

Sumala pa nga nagtago-tago na ang suspek sukad nga ilaha na kining gipangitaan sa mga petrolyo apan sa miaging gabii nakigkita si Degollacion kang Huele sa usa ka restaurant sa Gorordo Avenue sa barangay Kamputhaw.

Dihang mitunga si Huele daling nagpakitabang sa kapolisan si Degollacion aron masikop ang suspetsado.

Ang suspetsado gipasanginlan nga migasto sa dul-an sa P6 milyones  nga salapi sa tulo ka mga reklamante.

Kasamtangang natanggong karon sa Theft and Robbery Section ang suspetsado samtang naghulat sa kasong ipasaka kaniya. (/EIM)(BANAT NEWS)