DOE miawhag sa publiko magdaginot sa kuryente

CEBU, Philippines - Giawhag sa Department of Energy ang mga consumers sa kuryente sa Luzon ug Visayas ang "efficient use of energy" aron dili musamot ang kakulang sa kuryente sa Visayas human nangaguba ang linya sa kuryente atol sa bagyong Yolanda.

Matud pa ni Energy Secretary Carlos Jericho L. Petilla nga sugod Nobiyembre 8, 2013, ang Visayas grid nawagtangan og 500-MW kay wala na nag-operate ang Unified Leyte Geothermal Power Plant.

Dugang pa niya nga ang pagdaginot og kuryente sa Luzon dako na og matabang alang sa gikinahanglang suplay sa Visayas grid karong mga panahona.

Giawhag usab sa DOE ang mga dagkong kunsomidor sa kuryente nga paubsan nila ang ilang kunsumo pinaagi sa paggamit og gamay lang nga aircon ug pagtangtang sa mga electrical equipment nga wala gigamit.

Ang mga household consumers gidasig usab nga magdaginot sa paggamit sa kuryente pinaagi sa pagpalong sa mga suga nga wala gigamit ug ingon man pagkunhod sa gamit sa mga Christmas lights ug uban pang dekorasyon sa Pasko.

Gitinguha sa DOE nga sa dili pa muabot ang Pasko, ma- stabilized na ang suplay sa kuryente sa Visayas. (/EIM)(BANAT NEWS)