Tulisan gisuklan sa babaye mitalaw midagan
CEBU, Philippines - Napalpak ang usa ka tulisan nga drayber sa traysikol dihang misukol ang babayeng kolektor nga iya untang tulison diha sa hilit nga bahin sa Sitio Riverside, Barangay Dawis Norte, Carmen kagahapon sa hapon.
Ang biktima giilang si Angie Arestotiles, 21, collector sa NWTF lending company, ug residente sa Barangay Cogon, Tuburan.
Gipangita karon sa kapolisan ang drayber sa traysikol nga may plakang 4087-GY nga si Socrates Aparise Lacno kinsa daling miikyas human siya madis-armahi.
Sumala pa sa imbestigasyon sa kapolisan ang biktima sakay sa traysikol sa suspek gikan sa Barangay Panalipan, Catmon, kadungan ang laing upat ka mga pasahero nga nanganaog ra pud sa Public Market sa Barangay Cogon East sa Carmen.
Matud pa mipadayon ang biyahe tungod kay sa Danao magpahatud ang biktima apan pag-abot sa Dawis Norte giingong kalit nga miliko ang suspek sa tuo ug milahos sa hilit nga dapit. Pag-abot didto mikanaog kini ug gitionan og armas ang biktima apan misukol ang dalaga hinungdan nga nabuhian sa suspek ang armas nga nasuta nga toy gun ra diay.
Tungod niini, mibunot na usab og kutsilyo ang suspek apan sa gihapon nadis-armahan kini sa biktima hinungdan nga mikaratel nalang og dagan ang suspek nga way nadala bisan piso gikan sa iyang biktimahon. (BANAT NEWS)
- Latest
