Repacking station sa MBEA higpit ang pagbantay

CEBU, Philippines - Gipanghimakak sa mga sakop sa Department of Social Welfare and Development (DSWD) nga nag-repack sa mga relief goods sa Mactan-Benito Ebuen Air Base nga dunay mga volunteers nga nangawat sa mga relief goods nga gikan sa gawas sa nasud.

Matud pa nga dunay mga volunteers nga mibulsa sa mga imported nga delata ug mga imported used clothings nga gihulipan sa mga gisul-ob sa mga nag-repack nga volunteers ug ang daang sinina niini maoy ibutang sud sa mga pinutos nga used clothing.

Sumala ni Clarence Enoferio ang duty head sa DSWD nga nadistino sa PAF Base gym ug PAF Civil Military Operation Lt. Rene Piabol mipadayag nga imposibleng mahitabo ang maong pasangil.

Kasagaran sa mga miboluntaryo mao ang mga tinun-an uban sa ilang mga magtutudlo nga mi-supervise usab sa ilang mga estudyante ug ang uban gikan sa mga kompaniya sa MEPZA.Matud pa ni Lt. Piabol 24 oras nga dunay mga sakop sa base police ug PAF Intellegence ang naka-duty sa padayong 24 oras nga repacking sa mga relief goods.

Gumikan niini tanang volunteers gidid-an sa pagdala sa ilang mga bag sud sa repacking area sa PAF base ug sa paggawas niini susihon niini kung wala bay nakalusot nga hinabang gikan sa gawas sa nasud. (BANAT NEWS)