Lola gidunggab patay

CEBU, Philippines - Usa ka lola gidunggab patay sa  batan-on nga lalaki didto  sa barangay Kang-Actol, lungsod  sa Dumanjug, alas 8:00 sa miaging  buntag.

Giduslak sa plamingko  makaupat ka  higayon  sa  iyang tuong ilok   ang  biktima nga  milapos  usab  sa pikas  ilok. Ang biktima naila nga si Dionesia Boquecosa Perater, 78, minyo, molupyo sa barangay Bullogan sa lungsod sa Dumanjug. Ang suspetsado naila usab nga si Salvo dela Cerna, 29, ulitawo, molupyo sa barangay Kang-Actol sa maong lungsod .

Matud pa ni PO1 Nestor Villanueva nga nahinabi sa Banat News  nga tungod sa maong  samad nakabsan  diha-diha  sa kinabuhi ang  biktima.

Matud pa ni Villanueva nga ang biktima usa ka negosyanti og tambal ug matud pa batasan niini nga manuroy sa iyang baligya sa mga kabalayan. Sumala pa ni Villanueva nga wala’y dalang baligya ang maong biktima kay  igo  lang  kining  naningil  sa  mga  nakautang  kaniya  sa maong  higayon. 

Miingon  si Villanueva nga dihang nagkita ang suspetsado ug ang biktima wala’y daghang estorya giduslak dayon sa suspetsado ang naulahi  upat ka higayon sa  ilok  niini.

Daling milakaw ang suspetsado human sa maong hitabo ug nasikop  usab  dayon  kini  sa kapolisan sa balay sa iyang uyoan sa pikas nga barangay apan  wala  na  makita  sa  mga otoridad  ang  plamingko  niini  nga  gigamit  sa krimin. Nagkagulkol na  karon  sa prisohan  ang  suspek  samtang giandam  na ang  kaso  nga  ipasaka  batok  kaniya. (BANAT NEWS)