Task force pawikan gilusad

CEBU, Philippines - Ang Protected Areas, Wildlife Coastal Zone and Management Services ubos sa Department of Environment and Natural Resources-7 naglusad og "Interagency Pawikan Task Force" aron panghingusgan ang pagprotehir sa mga endangered marine turtles sa Central Visayas.

Ang  maong  task force maoy  mopatuman  sa inisug  nga  pagpanalipod  sa  nag-anam  na  pagkahanaw  nga  mga  pawikan,  sumala  pa  ni  DENR-7 Executive Director Isabelo  Montejo.

Ang Task Force Pawikan maoy  mopatuman  sa mga  lagda  ug  balaod   nga naggahum  sa mga  pawikan; paghimo og field investigation o  kaha  sa pagpaniid    sa  mga  taho  nga  gipanakop  kini  ug  gipamaligya  dayon  gipangihaw  ug  gipangaon usab  sa  mga  tawo.

Matud pa ni Montejo nga  ang mga pawikan giisip  na  kini  karon  nga  dyutay  na lang ang  maong  matang  sa binuhi  sa dagat.

Ug  kusog ang  risgo nga kini  hingpit  na  nga  mawagtang  kun  abusohan  sa katawhan  ang  maong  matang hayop  sa dagat.

Ang  labing  gikinahanglan  nga  panukdanan  aron  masanta  ang  pagpamaligya  ug  pagpangihaw  sa maong  mga  butang  mao  ang  pagpadasig  sa matag   tawo  nga ila  kining  protektahan inay  ihawon  ug  kaunon, dugang pa ni Montejo.(/WC)(BANAT NEWS)