500 ka balay sa Tulang Diyot, Camotes nahurot

CEBU, Philippines - Naluwas ang tanan nga molupyo sa isla sa Tulang Diyot  sa isla sa San Francisco, Camotes  apan ang 500 nila  ka balay nabanlas og  hurot sa pagkusokuso sa bagyong Yolanda.

Nasayran  nga sayo nga nakapamakwit ang  1,000 ka mga molupyo   nga  misanong sa mando ni Mayor Alfredo Arquillano.

Si Arquillano nga nahinabi sa mga tigbalita miingon nga dihang ilang natataw ang dakong kadaut nga  mugna  sa kusog  nga  hangin  sa bagyo, gipabakwit dayon   niya ang 1,000 ka mga molupyo sa nahisgotang isla.

Nakaginhawa  og  luag  si  mayor Arquillano  dihang  nasayran  niya  nga  wala’y  nakabsan sa kinabuhi  sa mga  molupyo sa maong  lugar.

Walay usa ka balay nga nahibiling  nagbarog, ang tanan nahurot gyud, matud  pa ni Arquillano. Sa nasayran   ang Tulang Diyot usa  ka isla  nga  buwag   sa isla sa Camotes  apan sakop sa lungsod sa San Francisco. Tua  kini  mahimutang sa tunga-tunga nga bahin sa lalawigan sa Sugbo ug Leyte nga adunay 1.5 ka kilometro   ang gitas-on ug 500 metros ang iyang gilapdon.

Ang pagkusokuso sa bagyong Yolanda niadtong Nobiyembre 8 maoy nakaingon sa kamatayon sa liboan ka mga kinabuhi  sa  Leyte  ug amihanang  bahin  sa Sugbo.

Giawhag   sa mayor  ang  mga molupyo sa Tulang Diyot sa  hingpit  nga pagbiya  sa maong dapit ug  mangita sila   og permanenting  kapuy-an sa San Francisco. (/WC)(BANAT NEWS)