Bugas sa BOC i-donate sa biktima sa bagyo

CEBU, Philippines - Ang Bureau of Customs (BOC)-Cebu andam modonar sa liboan ka sakong bugas humay nga gi-forfeit na pabor sa gobiyerno.

Matud pa ni BOC-Cebu district collector Paul Alcazaren nga si Kongresista Benhur Salimbangon (fourth district) ug si Gobernador Hilario "Junjun" Davide III nihangyo na kaniya alang sa maong donasyon.

"Andam og tagana mi mo -donate sa bugas. Ang akoa karong gipaabot ang approval ni Customs Commissioner Ruffy Biazon," matud pa ni Alcazaren.

Ang BOC-Cebu nakasakmit og smuggled rice nga gisulod sa 11 ka mga container vans.

Matud pa ni Alcazaren nga ang maong 11 ka container vans adunay sulod nga 5,500 ka sakong bugas.

Ang maong mga nasakmit nga sinakong bugas, adto i-donar sa Amihanang Sugbo nga maoy grabeng naigo sa pagkuso-kuso sa super typhoon Yolanda.

Sa laing bahin, ang Environmental Management Bureau-7 nag-awhag sa mga kompaniya ug mga organisasyon nga mosalmot sa Sunrise Festival karong Nobiyembre 22-24, 2013 adto sa Plaza Independencia, Cebu City.

Nagkalainlain ang  mga  kalihokan  nga giandam alang sa pagtabang sa mga biktima sa  bagyo.

Giawhag usab sa EMB-7 nga magdala og mga relief goods ang buot motambong. (BANAT NEWS)