Ugangan gipatay sa umagad

CEBU, Philippines - Patay ang 83- anyos nga  babaye human  pusila  sa iyang umagad  didto  sa barangay Cabadiangan, lungsod sa Compostela  sa  alas 8:00 sa miaging  gabii.

Ang biktima mao si Antonia Cabatingan Paradiang  nga nagpuyo sa maong lugar ug  ang suspetsado  mao si Victor Morales Bacharo, 54, nga umagad  sa biktima  nga nagpuyo usab sa maong dapit.

Si PO3 Arnold Luna sa kapolisan sa maong lungsod nga nahinabi sa Banat News miingon nga ang suspetsado kinsa  giingong tiggamitan og shabu  nangita sa iyang asawa nga si Fe sa maong  higayon.

Didto  kini  sa balay  sa iyang  inahan  nga  maoy    biktima, kauban sa iyang anak, nga si Warren, 7.

Matud  pa sa kapolisan  nga  sa pag-abot  sa suspek  didto  sa balay  sa biktima  maoy unang nakita niini si Warren nga naglingkod sa pultahan sa  balay ug maoy unang gipusil apan suwerte kay dali kining nakahupo ug mikaratil sa pagdagan pahilayo sa maong dapit.

Ang iyang asawa nga si Fe nga gibati og kalisang dali  usab  nga  midagan  ug  didto kini  moagi  sa  kusina , busa  nahibilin  sa sulod  sa balay ang  biktima.

Dihadiha  gipusil kini  sa  suspetasado  gamit ang  iyang  armas nga kalibre 38 nga revolver ug naigo kini sa walang bahin sa iyang ilong nga milapos  sa luyong bahin sa iyang ulo nga maoy nakaingon sa iyang hinanaling kamatayon.

Matud pa ni PO3 Luna nga dihang ilang nadawat ang maong taho sa mga silingan labot sa maong hitabo dali nilang gilusad ang hot pursuit operation.

Tungod  kay  mitahan  man sa konsehal  sa barangay  ang  suspetsado dali  ra usab  kining  nasikop  sa kapolisan.

Ang suspetsado nga nagtingkagol na karon sa  detention cell  sa  kapolisan gitakdang  pasakaan  og  kasong   murder ngadto sa korte karong adlawa. (BANAT NEWS)