Arsobispo sa Leyte midangop sa Cebu aron mangayo og hinabang

CEBU, Philippines - Usa sa kapin sa tulo ka libong evacuees gikan sa Tacloban City nga nibakwit dinhi sa Sugbo mao si Palo Leyte Archbishop John Du nga nahimo usab nga kura paruko kaniadto sa Santo Rosario Parish Church sa P. Del Rosario ning syudad sa Sugbo.

Si Du niabot dinhi sa Sugbo niadtong Huwebes luwan sa usa sa mga abyon nga nigikan sa Tacloban ug nibalik sa tugpahanan sa Mactan. Si Du niasoy nga nakasaulog pa siya og Santos nga Misa sa cathedral sa Leyte dihang niigo ang mangtas nga bagyong Yolanda. Sigon pa niini nga nisaka sila sa bag-o ug taas nga building duol sa cathedral uban sa kapin sa 500 ka mga residente sa maong lugar. Maayo na lamang nga may natigom siyang daan og mga canned goods human sa pagsaulog sa iyang adlaw nga natawhan niadtong bulan sa Oktubre nga maoy ilang gikaon uban sa mga residente sa maong lugar.

Iyang gitataw nga nianhi dinhi sa Sugbo aron pagpangayo usab og pakitabang nga matukod ang nagubang mga simbahan sa Leyte nga naguba usab sa bagyong Yolanda.

Gipahibawo usab niini nga sa wala pa ang bagyo niabot ang imahe sa Birhen sa Fatima nga gikan sa Portugal nga gilibot sa tibuok kalibutan nga iyang gitumbok nga maoy nagpanalipod kanila.

Kini tungod kay ang tanang mga kaparian, mga seminarista ug mga lay ministers sa maong lugar ang luwas apan may usa ka pari nga nakaangkon og mga samad bunga sa iyang paglangoy paingon sa mas luwas nga lugar. Sumala pa ni Du nga dili gyud unta siya mobiya sa maong lugar apan gikinahanglanon kini aron makapangayo usab og tabang.

Hinuon iyang gitataw nga karong Sabado molarga usab siya og balik paingon sa Leyte aron pagdala og mga hinabang alang sa katawhan sa maong lugar nga nabiktima usab sa bagyong Yolanda. (/EIM)(BANAT NEWS)