Naatrasan sa trak de karga patay

CEBU, Philippines - Usa ka lalaki ang naatrasan patay sa usa ka cargo truck nga padulong moluwan sa usa ka bapor sa Tabuelan Wharf sa sitio Quasi, barangay Poblacion sa Lungsod sa Tabuelan sa alas 8:20 sa miaging buntag.

Ang biktima naila nga si Jesus Pajunar Jayag, 53, molupyo sa barangay Paknaan sa dakbayan sa Mandaue.

Samtang ang drayber sa cargo truck naila nga si Juan Labores Alberio, 50,  taga barangay Balabag sa dakbayan sa La Carlota sa Negros Occidental.

Base sa spot report sa Cebu Provincial Police Office nga nag-atras ang maong trak sanglit mosaka unta kini sa rampa sa  barko sa Cadiz Navistar Shipping Lines dihang naigo niini ang biktima diha sa luyo ug natumba ug naligsan sa ligid sa atras.

Daling gidala ang biktima sa Tabuelan District Hospital apan gideklarar na kini nga dead on arrival sa mga doktor sa maong tambalanan.

Ang suspetsado ug ang iyang gimaneho nga sakyanan kasamtangang gikustodiya sa Tabuelan Police Station.  (BANAT NEWS)