Duha gipamusil usa ang patay

CEBU, Philippines - Usa ang patay ug usa ang angol human sila pamusila sa usa ka wala pa mailhing lalaki nga nagmotor sa barangay Balud sa lungsod sa Dalaguete pasado ala una kagahapon sa kaadlawon.

Ang nakalas naila nga si Exequel Tecson, usa ka construction worker, samtang naangol ang iyang higala nga si Manuel Busatamante Arado, 37. Si PO3 Nelson Saquibal, imbestigador sa Dalaguete Police Station nga nahinabi sa Banat News miingon nga ang mga biktima naglibod-suroy sa dalan sa Barangay Balud sa sayong kaadlawon dihang gihunongan sila sa usa ka lalaking nagmotor ug gikaestorya ang mga biktima.

Sa kalit lang, mipaka-paka ang buto sa armas ug nangahagba ang duha ug gibiyaan sa suspek.

Upat ka samad sa iyang lawas ang nahiaguman ni Tecson nga nakaingon sa iyang hinanali nga kamatayon samtang nakaangkon og tulo ka samad sa iyang lawas ug nawong si Arado.

Gidala si Arado sa Julio Cardinal Rosales Hospital apan gibalhin kini sa usa ka tambalanan sa dakbayan sa Sugbo. Pito ka basiyo sa kalibre 45 ang nakuha diha sa crime scene, wala pa mahibaw-i sa kapolisan ang motibo sa pagpamusil.  (BANAT NEWS)