300 ka pamilya namakwit dinhi

CEBU, Philippines - Gibanabanang 300 ka pamilya kang kansang kabalayan gikupog sa bagyo’ng Yolanda didto sa Tacloban City ang namakwit dinhi sa dakbayan tungod sa kalisod didto sa ilang dapit. Si Mayor Michael Rama gihangyo ni DSWD regional director Mercedes Jabagat nga pangitaan og dapit dinhi sa dakbayan ang maong mga bakwit nga temporaryo nila nga kapuy-an.

Gisugyot ni Jabagat nga papuy-an sa mao nga mga pamilya ang Cebu City Sports Center (CCSC) apan ang mayor miingon nga dili mahimong gamiton ang sports center tungod sa mga nakahan-ay na nga sports activities nga anha ipahigayon. Gipasusi ni Rama ang sports complex sa barangay Tinago ug sa uban pa nga mga barangay nga posible nga magamit ug temporaryo nga kapuy-an sa mga bakwit nga pamilya. Matud sa mayor nga ang kagamhanan sa dakbayan sa Lapulapu ug kanait nga mga dakbayan dinhi sa Sugbo angay usab nga motabang sa maong mga bakwit ug dili ra kay ang siyudad.

Kabahin sa pagkaon sa maong mga bakwit kun dia pa sila sa Sugbo, matud ni Rama nga ang DSWD  maoy angay’ng motagad sa mga problema kay usa sila ka ahensya sa nasudnong kagamhanan. Ang maong mga pamilya misakay paingon dinhi sa Sugbo sa mga C-130 planes sa Philippine Air Force nga naghatud og mga relief goods ug pagkaon didto sa Tacloban City. (Rene U. Borromeo/EIM) Call center agent nalipay sa naabtan sa Tacloban

Usa ka 26-anyos nga call center agent nga nagtrabaho sa Cebu ang nag-emergency leave sa iyang trabaho aron mosusi sa iyang pamilya lakip na niini ang iyang 96-anyos nga apohan ug 77-anyos nga inahan ngadto sa dakbayan sa Tacloban.

Si Reyno Campos, nga tungod sa iyang kabalaka wala siya’y ganang mokaon ug dili siya makatarong sa iyang trabaho. Uban sa laing tulo ka mga taga Tacloban nakasakay sila niadtong Sabado sa tungang gabii dala ang pipila ka pagkaon panginahanglan sa ilang mga pamilya sa barko sa Philippine Navy. Tungod kay walay kasakyan naglakaw siya og tulo ka oras padung sa ilang balay ngadto sa Phase 2, V&G Subdivision unom ka kilometro gikan sa downtown area.

Dako ang iyang kalipay nga iyang naabtan ang iyang apohan, inahan, iyaan ug duha ka mga ig-agaw nga nagduwa-duwa sa iyang unom pa ka buwan nga pag-umangkon. “Nakahilak ko sa kalipay kay kompleto sila”, ni Campos pa.

“They just prayed for four hours samtang sige ang bagyo,” matud ni Campos. Wala kaayo maguba ang ilang balay kay habog kini og napulo ka tiil ug wa maabot sa tubig.

Karong adlawa si Campos gikatakdang mobiyahe paingon ngadto sa Leyte aron pangitaon ang iyang manghod nga babaye nga nagtrabaho sa maong lugar  nga iyang gituohang mi-survive.

Dugang ni Campos nga kung makit-an na niya ang iyang manghod dad-on niya silang tanan dinhi sa Sugbo hangtud nga mobalik sa normal ang ilang lugar. (BANAT NEWS)