Klase gikanselar tungod ni Zoraida

CEBU, Philippines - Ang Department of Education-Cebu Province ug si Cebu City Mayor Michael Rama mideklarar nga walay klase ang mga tunghaan sa tibuok habagatang bahin sa Sugbu ug sa Cebu City kagahapong adlawa tungod sa bagyong Zoraida.

Gibutang sa PAGASA ang southern Cebu sa signal number one atol sa pagsulod sa bagyong Zoraida sa Surigao del Sur.

Dinhi sa siyudad sa Sugbu, si Mayor Rama mideklarar nga way klase ang mga eskuylahan tungod sa mao gihapong bagyo.

Ang ubang siyudad sama sa Mandaue, ug Talisay, mideklarar usab nga half-day ra ang klase sa ilang tagsa-tagsa ka hurisdiksiyon

Matud pa ni Arden Monisit, ang DepEd-Cebu provincial schools division superintendent nga ilang gideklarar pag alas 6:30 sa buntag kagahapon nga walay klase sa dihang nisulod na sa Philippine Area of Responsibility ang bagyong "Zoraida." Wala say klase sugod kagahapon (Nobiyembre 11) hangtud Nobiyembre 15 ang tanang munisipyo sa northern Cebu human naigo sa bagyo, susihon pa karong Biyernes kung mabalik na sa normal ang tanan  una pa desisyonan kung mobalik ba ang klase sa adlaw nga Lunes. (BANAT NEWS)