29 mil ka pamilya sa Daanbantayan apektado sa Yolanda

CEBU, Philippines - Mikabat  sa 29 mil ka pamilya ang naapektohan sa super typhoon Yolanda sa lungsod sa Daanbantayan nga  mikalas usab  og   50 kapin ka tawo.

Si Daanbantayan Mayor Agusto "Itok" Corro nagkanayon  nga mas labaw nilang gikinahanglan karon ang pagkaon, tubig, medisina, tolda ug mga senina alang sa mga residenteng nabiktima sa maong trahedya.

Giangkon ni Mayor Corro nga dili igo ang ilang gahin sa paghatag og hinabang ngadto sa mga biktima hinungdan nga ila unang gihatagan og priyoridad ang isla sa Malapasqua ug Carnasa nga pulos  lisud  og agianan.

Ang paghawan sa kadalanan padung sa sentro  sa Daanbantayan maoy giuna sa lokal nga   mga  opisyal aron dali nga makaagi ang mga modala og hinabang ngadto sa mga biktima.

Gikaguol usab ni Mayor Corro ang kahimtang sa mga   bakwit  nga nakasinati  na og mga balatian  sa panglawas  mugna sa nagpadayon  nga  ulan .

Nasuta  usab  nga  mikabat  sa 95 porsiyento sa 20 ka barangay sa maong  lungsod  ang  nahiagum sa labing  kusog  sa hangin  ni Yolanda diin 29 mil ka  pamilya ang nawad-an og panimalay, mga  dagko  ug  gagmay.

Nanghinaut si Mayor Corro nga kahatagan  dayon  kini og pagtagad ni Presidente Benigno "Noynoy" Aquino   ug  ikahatag  ang panginahanglan sa mga residente sa Daanbantayan. (BANAT NEWS)