13th month pay gimando sa konseho nga ipahatag na
CEBU, Philippines - Giawhag sa mga konsehal sa dakbayan sa Sugbo si Mayor Michael Rama nga ihatag na ang 13th month pay ug ang nahabiling cash gifts alang sa mga kawani sa Cebu City Hall.
Kini maoy ilang nauyonan kagahapon dihang ang mga konsehal sa dakbayan mihimo og special session atul sa pagtuki sa isyu nga paghatag og hinabang-salapi sa mga biktima sa Tacloban.
Matud sa mga konsehal nga daghan usab sa mga kawani sa City Hall ang nanginahanglan karon og salapi aron ipaayo sa ilang kabalayan nga naapektahan sa miaging linog ingon man sa bagyo’ng Yolanda.
Gani nasayran nga daghan man sa mga kawani sa City Hall ang mipahimulos sa gitanyag nga Calamity Loan sa Pag-IBIG ug sa General Service Insurance System (GSIS).
Si Rama hinoon wala dayon mopasalig nga tumanon niya ang giawhag sa mga konsehal kay matud niya angay’ng tukion usa kini sa iyang mga sinaligan ilabi na sa City Administrator, Budget Officer ug City Treasurer.
Matud sa mayor nga walay problema alang kaniya ang paghatag na sa 13th month pay sa mga kawani kun ang dakbayan adunay magamit nga pundo kabahin sa mao nga katuyoan.(/EIM)(BANAT NEWS)
- Latest
