Nakalas sa CV nagkadaghan

CEBU, Philippines - Padayon nga nagsaka ang mga nakalas sa Central Visayas nga miabot na og 53 ka mga tawo diin usa niini ang gikan sa Bohol ug posible pa kini nga modaghan sa umaabot nga mga adlaw sumala pa sa kapolisan.

Ang Public Information Officer sa Police Regional Office 7 nga si Supt. Renato Dugan miingon nga duna say 34 ka mga tawo nga naangol  ug walo ang missing.

Matud sa Regional Director sa Police Regional Office 7 Chief Supt. Danilo Constantino, kasagaran sa mga nakalas mao ang mga tawo nga nagmakuli sa paghawa sa ilang mga balay.

“Yung mga victims ay nadaganan ng puno at ng debris ng bahay,” matud pa ni Constantino sa press conference.

Miingon si Constantino nga naglisod ang kapolisan sa komunikasyon hangtod karon tungod kay wala pa gihapon maayo ang mga linya sa komunikasyon ug kuryente sa amihanang Sugbo.

Gawas pa niini, si Constantino miingon nga ang ilang radio transmitter sa barangay Busay sa dakbayan sa Sugbo naguba usab.

Nagpadala na usab og 66 ka mga polis ang PRO7 ngadto sa Isla sa Bantayan aron motabang sa disaster management operation nga gibahin sa duha ka platoon pinangulohan ni Insp. Alfredo Mayol ug ni Insp. Rey Delos Santos.

Gipadala usab ang 56 ka mga polis sa amihanang Sugbo sa pagtabang sa pag-iway sa mga kahoy nga nag-ali sa kadalanan ug natumba sa mga linya sa kuryenti ug telepono.

Samtang 32 sab ka mga polis ang gipadala ngadto sa Tacloban  City aron ipuno sa mga pwersa sa kapolisan sa maong dakbayan.

Laing 66 ka mga polis ang gipadala ngadto sa Ormoc City aron sa pagtabang usab sa kapolisan sa maong dakbayan ug naa pay 50 ka mga polis nga reserba nga ipadala sa bisan asang lugar nga nagkinahanglan og tabang. (/EIM)(BANAT NEWS)