JO sa Talisay gitibhangan na

CEBU, Philippines - Mikunhod  na  ang  mga  empleyadong  job  order (JO)  sa dakbayan  sa Talisay  sumala  ni Talisay  City administrator  John Yre delos  Reyes.

Iyang  gitug-an  sa Banat News  nga  gikan  sa 2,000  gilaslasan  kini  og mga 400  busa  aduna  nalay  mga  1,600  ang  tanan  karon.

Miingon  si delos  Reyes  nga  kaniadto  rang  katapusang semana  sa Oktubre  nila  pahunonga  sa trabaho ang wala  na  kinahanglana  nga  mga  JO.

Matud  pa  niya  nga ila  kining  gihimo  tungod  sa daghang  katalagman  nga  nagkinahanglan  og  budget,  busa  aron  makadaginot,  ilang  gitibhangan  ang  gidaghanon  sa ilang  mga  JO  aron ang  isuweldo niini  idugang na lang  sa  pundo   aron  itabang  niadtong  mga  nabiktima  sa  linog  ug  bagyo.

Gani  miingon  si  delos Reyes  nga  sa ilang  gihimo, nakadaginot  na  og P3.6 milyones matag  buwan.

Kahinumdoman  nga  matag  JO  magdawatan  og  P6,000  nga suhol  matag  buwan, busa  gahinan  gayud  sa dakbayan  og P12 milyones  ang  para  sa ilang  suhol matag  buwan.

Sa panahon  ni  kanhi  Kong. Eduardo Gullas,  mikabat  ra  sa 200  ang  JO  sa Talisay  apan  dihang  mipuli  ang bag-ong  administrasyon  misaka  kini  ngadto  sa 2,000. (/WC) (BANAT NEWS)