40 na ang patay sa Cebu

CEBU, Philippines - Nagkadaghan na ang patay sa rehiyon human gikuso-kuso sa bagyong Yolanda ang rehiyon niadtong miaging adlaw.

Matud pa sa tigpamaba sa Police Regional Office 7 Supt. Renato Dugan nga sa tibook rehiyon nakatala na ang kapolisan og 40 ka mga tawo nga nakalas sa bagyong Yolanda. Kompirmado nga nakalas ang 39 ka mga tawo sa lalawigan sa Sugbo lakip na niini ang pito ka mga tawo sa lungsod sa Bantayan. Ang maong mga tawo mao sila si Cresencio Caraballe, 40, molupyo sa barangay Bailad, Apolinario Dawa Opril, 60, molupyo sa barangay Bantigue,     Pedong Pedong Forrosuelo 90, molupyo sa barangay Guiwanon, Susan Soriba, 40, molupyo sa barangay Patao. Arturo Alon, 40, molupyo sa barangay Sulangan, Rolly Guidacan Vilarosa, 22, molupyo sa barangay Sunko, Dionisio Abello, 66, molupyo sa barangay Kampingganon.

Samtang sa Madridejos sa samang isla may natala nga tulo ka mga tawo nga nakalas nga naglakip nila ni Edgar Despi, 32, sa barangay Bunakan, Alberto Prietos, 46, sa barangay Tarong ug ang usa ka Dodong nga usa pa lang ka tuig sa barangay Tarong. Samtang sa dakbayan sa Lapu-lapu usa sab ang nakalas ug dunay gikataho nga 24 ka mga tawo ang angol samtang pabiling missing ang lima ka mga tawo sa upat niini sa Sugbo ug usa niini sa lalawigan sa Bohol.  Sa dakbayan sa Sugbo unom ka mga lugar ang gikatahong midahili ang yuta ug napulo ka mga lugar nga dili maagian pa hangtod karon.

Samtang 170 ka mga kahoy ang naibot sa bagyo ug 361 ka mga edepisyo ang naguba.  Pabilin nga wala pay kuryenti ang kapin sa 1,500 ka mga barangay sa tibook rehiyon. (/EIM) (BANAT NEWS)