Puya nga patay gisud sa plastic ug gibitay sa koral

CEBU, Philippines - Gisulod  sa  plastic  ang  patay  nga  puya ug  gisab-it  sa koral  sa  Lying-In clinic nga nahimutang sa Poblacion Oriental sa lungsod sa Consolacion,  kagahapon sa pasado  alas 6:00  sa buntag.

Si PO1  Albert Jimenez sa kapolisan sa maong lungsod nga nahinabi sa Banat News miingon nga unang nakamatikod sa plastic nga gibitay sa koral mao ang drayber sa ambulansiya sa Lying- In Clinic ug ang guwardiya nga si Romulo Sasing.

Matud pa ni PO1 Jimenez nga nagtuo lamang ang duha nga ang  sulod  sa plastic, hinabwa nga sulod sa ginhawaan sa giihaw nga baboy nga gilabay sa maong dapit maoy hinungdan nga gipaabot na lamang nila nga kuhaon kini sa trak sa basura nga molabay sayo sa buntag.

Apan  si   Romil Auditor nga taga barangay Cansaga sa maong lungsod nga nahiagi sa maong dapit nga nanguryuso sa pagtan-aw niini  nahingangha dihang nakita niini ang naputol nga ulo sa bata nga nasagol sa nahabwa nga  murag tinai.

Matud pa ni PO1 Jimenez nga  sa pagkamatikod niya   sa ulo sa bata nga gisulod sa plastic dali kining midagan ngadto sa ilang buhatan ug gitaho niini ang iyang nakita.

Si PO1 Jimenez  nagkanayon  nga ilang nakompirmar nga puya nga lalaki nga bag-ong gihimugso ang sulod sa plastic   uban  sa  lawas ug putol nga ulo  ug inunlan niini.

Nagtuo ang kapolisan nga bag-o pa nga gihimugso ang maong puya sa  wala hiilhi nga inahan.

Si PO1 Jimenez miingon nga  gisusi  na nila  karon  ang  maong  hitabo aron  ilhon  ang  inahan  sa maong  batang  gamay.  (BANAT NEWS)